< Back to Transcripts

Message of Vice President Leni Robredo Pantao Ragat People's Rally Pantao Ragat Central School Grounds, Pantao Ragat, Lanao del Norte

May 4, 2022
Pantao Ragat, Lanao del Norte
No items found.

VP LENI: Magandang hapon po, mga taga-Pantao Ragat! Magandang hapon din sa mga taga-ibang bayan ng Lanao del Norte. Ang akin pong pagbigay galang sa atin pong minamahal na mayor, Mayor Mohammad Daud Nabil “Ayran” Dimaporo Lantud, magandang hapon po. Ang atin pong minamahal na vice mayor, Vice Mayor Lacson Mangotara Lantud, maraming salamat. At siyempre po, ang ating minamahal na former mayor, magkapangalan po kami, former mayor Eleanor Dimaporo Lantud. Maraming salamat po, Mayor.

Kasama din po natin si Ryan Bin Lacson Dimaporo Lantud. Nandito din po, Congressman Mujiv Hataman ng Basilan. Ang atin pong gubernatorial candidate, Judge Nagamura Moner; ang ating vice gubernatorial candidate, Engineer Mohammad Harrison Caye Pasandalan; ang atin pong First District congressional candidate, Attorney Osop Joe Abbas; ang atin pong mga SB Officials; mga punong-barangays sa pangunguna po ng ating ABC Mama Mulituba, maraming salamat. Former mayor Bai A Labi Sa Timbab of BUTIG-LDS; 'yung iba't-iba pong mga mayors na kasama natin ngayon; iba pa pong mga local officials, sa inyo pong lahat, magandang, magandang hapon ulit.

First time po ako nakarating dito sa Pantao Ragat. Napakapalad niyo kasi napakaganda ng bayan niyo. [Crowd cheers] Alam niyo po, lagi na akong nakakapunta sa Balo-i. Magkatabi lang pala ito pero ito ngayon ko lang napuntahan. Ang dahilan po kung bakit pabalik-balik po kami sa Balo-i, dahil noong meron pong Marawi siege meron pong mga evacuees sa Balo-i. Pero bago pa man po nagka-Marawi siege, marami na po kaming mga proyekto sa ibang bayan sa Lanao del Sur saka sa Lanao del Norte.

Dito po sa Lanao del Norte, meron po kaming mga projects sa Tubod, sa Tangcal, saka sa Kauswagan. Sa Lanao del Sur naman po maraming mga lugar ang meron po kaming mga projects. Kaya ko po ito kinukuwento sa inyo dahil mula po noong ako nag-Vice President, ito na po 'yung aming tinututukan. Karamihan po sa mga proyekto namin nasa Mindanao.

Kaya din po kami malapit kay Congressman Mujiv dahil marami po kaming proyekto sa Basilan. May mga proyekto po kami sa Sulu at Tawi-tawi. May mga proyekto po kami sa Zamboanga Sibugay, saka Zamboanga del Norte. Marami po dito sa Lanao del Sur, Lanao del Norte, saka marami din po sa Bukidnon.

Bakit po ba marami kaming proyekto dito? Dahil po 'yung paniniwala namin, dapat ang national government mas tinutulungan 'yung mga lugar na malalayo, 'yung mga lugar na mahirap puntahan, at mga lugar na bihirang bisitahin.

Kaya po sinasabi ko ito ngayon dahil pag eleksyon marami pong hihingi ng tulong sa atin na mga kandidato. Di ba? Maraming hihinging tulong na mga kandidato. Lagi po nilang sasabihin mahal nila kayo. Pero dapat ang lagi nating tanong sa kanila, papano ba nila pinakita 'yung pagmamahal nila sa atin?

Kaya po kami– kaya po namin ito kinukuwento sa inyo kasi mula po nang naging Vice President ako, hindi po kami huminto magtrabaho para tulungan ang pinaka mga nasa laylayan ng lipunan.

Lahat din pong kandidato magsasabi ayaw nila ng korapsyon. Pero kami po pag sinabi naming ayaw namin ng korapsyon, marami po kaming pruweba na talagang ang aming mga hinawakan na posisyon talaga pong walang record ng anumang anomaliya.

Ang Office of the Vice President po sunud-sunod na taon, anim na taon lang po ako nag-Vice President pero sunud-sunod na taon, lagi pong nakukuha ng opisina namin 'yung pinakamataas na COA Audit Rating. 'Yan po 'yung dahilan kung bakit kahit kaunti lang 'yung budget namin, marami kaming mga proyekto dito sa inyo.

At 'yun din po 'yung aming pinapangako sa inyo. Ang pinapangako po namin sa inyo, pag ako po naging Pangulo, pag si Senator Kiko naging Vice President, pag 'yung mga senador po natin tinulungan natin, sisiguraduhin po namin na maasikaso namin 'yung mga pangangailangan niyo dito sa [Lanao del Sur]. Marami po ditong pangangailangan, maraming mga tao ang naghihirap, lalong lalo na po dahil 'yung mga magsasaka at mangingisda natin ngayon, hirap. Napakamura ng bili ng mga produkto nila, pero napakamahal naman, napakamahal ng abono, napakamahal ng kuryente, napakamahal ng gasolina. Kaya po sisiguraduhin namin na pag kami naging Pangulo, matututukan namin ito.

Alam niyo po, mahirap kasi pag hindi bumibisita 'yung public official sa lugar. Dahil, pag hindi siya bumibisita, hindi niya naman nalalaman kung ano 'yung sitwasyon. Hindi niya naman nakakausap ng personal 'yung mga taong apektado. Pag pagbabasehan niya lang po 'yung mga reports sa kaniya, hindi naman 'yun sapat, di ba? Kaya kami po, pag tiningnan niyo po 'yung record namin, ang amin pong buong buhay, lagi kaming nasa komunidad.

Ngayon po, nakita ko kung gaano kaganda ang lugar ninyo. Nakita ko po na mababait 'yung mga tao dito. Kahit po first time ko–

[crowd cheers]

Kahit po first time kong nakarating dito sa inyo, ipinaramdam niyo na po sa amin, ang inyong pagmamahal at suporta sa amin, kaya maraming, maraming salamat. Sayang po umulan, nabasa ang iba sa inyo. Pero 'yun nga, kahit po basa na 'yung iba, nandito pa din kayo, naghintay sa akin, kaya po maraming, maraming salamat.

Ang akin lang pong panghuli, nagpapasalamat po ako kina Mayor, kina Vice Mayor, siyempre sa ating former Mayor, sa pag-ako po sa aming pakiusap. Pakiusap na tulungan kami, hindi naman po kami magkakilala dati, pero ang kanila pong sadya lang, kung sino ang tingin nilang magdadala ng kabutihan dito sa inyo.

[crowd cheers]

Malaking bagay po sa amin 'yun. Malaking bagay po sa amin na ang mga local officials dito ang tinitingnan hindi kapakanan nila kundi kapakanan ninyo, kaya napaka suwerte niyo po sa inyo mga local officials.

Ang BARMM, ang Lanao del Norte, iba pang mga probinsiya dito po sa Mindanao, malapit na malapit sa puso namin. Siguro po kung merong lugar na lagi naming pinupuntahan, dito po 'yun sa inyo dahil marami po kaming proyekto dito.

Ang pinaka example nalang po ng proyekto, halimbawa po sa Tangcal, naglagay po kami doon ng facility para po sa pag gawa ng, ano ito, virgin coconut oil. Pantulong, para po 'yung mga coconut growers natin, merong pandagdag. Meron pong pandagdag sa kanilang– kasi 'yung copra, ang baba ng presyo, 'yung ngayon na meron na silang virgin coconut oil, ito po nakakatulong sa kanilang income.

Kabibisita ko lang po sa kanila. Kabibisita ko lang sa kanila noong nakaraang buwan, ang problema naman nila doon: laging walang kuryente. Kaya po 'yung ginawa naming facility, pahinto-hinto 'yung paggawa, 'yung processing dahil laging walang kuryente. Kung hindi ako bumisita doon, hindi ko din malalaman, kaya po maganda na binibisita.

Sa Kauswagan naman po, 'yung aming pong proyekto doon para sa mga farmers. Ito po, 'yung mga farmers, pagbigay po sa kanila ng mga ayuda para makatulong sa kanilang pangunguma. Pero meron pa din po kaming isang project doon na para siyang ALS, 'yung pong Alternative Learning System, pero para po ito doon sa mga rebels na bumalik na sa fold ng pamahalaan. Tuloy-tuloy po 'yun, ang kabutihan, dahil 'yung mga graduate noon, may mga maayos ng trabaho.

Dito po sa Pantao Ragat, nakilala ko na kayo, Vice President pa naman po ako hanggang June 30, kaya po ang promise ko sa inyo: pagkatapos ng eleksyon, kasi bawal ngayon, magco-confer po kami nina Mayor kung ano 'yung puwede naming itulong na kabuhayan dito sa inyo.

[crowd cheers]

Siyempre po pag naging Pangulo tayo, mas marami 'yung puwedeng itulong na talagang mararamdaman ng mga taga dito sa inyo. Kaya po maraming, maraming salamat– Ayun, huminito na 'yung ulan, kaunti na lang. Hindi pa pala, kaunti nalang, pero basa na 'yung iba, pasensya na po kayo. Pero ang promise ko po sa inyo: babalik ako sa napakagandang lugar niyo para mas maraming oras na magkakasama tayo.

[crowd cheers]

Maraming, maraming salamat po ulit. Mabuhay po kayong lahat.

[END]