< Back to Transcripts

Message of Vice President Leni Robredo at the Danao People’s Rally, Danao City, Cebu

April 21, 2022
Danao City, Cebu
No items found.

VP LENI: Ayan. Maayong hapon 5th District ng Cebu! Napakagandang lugar, napaka-init ng pagtanggap sa amin kaya maraming maraming salamat po. Bago po ako magpatuloy, ang akin pong pagbigay galang sa atin pong ginagalangan na mayor, Mayor Nito Durano maraming salamat po sa pagtanggap sa atin. Ano 'yun? Bawal. Grabe, alam niyo parang hindi pa kayo pagod ano? Hindi ba kayo napapagod? Ayan. Kasama po natin ngayong hapon, Vice Governor Junjun Davide. Magandang hapon din po kay former Vice Governor Agnes Magpale at siyempre po, kay Congressman Gubernatorial bet, Ace Durano. Ang atin pong mga councilors na kasama po natin ngayong hapon. Nandito din po si Councilor Madeline Yuson Pepito ng Municipality of Compostela. Nagpapasalamat po tayo sa ating mga main organizers: RPC Cebu 5th District, sa pangunguna po ni Doctor Dollie Timtim, ang ating District coordinator, maraming salamat. Maraming salamat din po sa Lenisin Movement sa pangunguna po ni Attorney Tom Riveral. Lenisin Youth, maraming salamat. RPC Balamban saka Asturias. 5th District for Leni-Kiko. Danaoanon Youth for Leni. IMP Para sa Kausaban of Municipality of Compostela. 'Yung mga representatives ng iba't ibang bayan sa 5th District. Nasaan po dito ang mga taga-Borbon? Meron ba? Taga-Sogod? Mga taga-Catmon? Taga-Carmen? Taga-Danao? Ang sabi po sa akin, marami na daw nauna doon sa Mandaue. Sasama pa ba kayo doon?

Ayan, pero alam niyo po, pang-ilang lugar na ba namin ito ngayong araw? Galing na po kami sa Bantayan, galing kami sa Bogo, galing na po kami sa Tabuelan, galing na kami sa Tuburan. Ngayon nandito kami sa Danao, mamaya po nandoon tayo sa Mandaue. Bakit po ba pinapahirapan natin 'yung sarili natin? Bakit hindi na lang isang malaking rally para hindi nakakapagod. Sinasadya po namin na talagang pumunta dito sa inyo para po 'yung mga hindi makakapunta sa Mandaue, kahit papaano makakausap pa din namin.

Noong huli ko pong punta dito noong February 24, ang inikot naman po namin 'yung southern part ng Cebu. Pumunta po kami sa Argao, pumunta po kami sa Talisay, pumunta kami sa Toledo, tapos nagkaroon tayo ng malaking rally sa Cebu City. Ngayon, pinagpapaguran ulit natin dahil ito po 'yung gusto naming ipakita sa inyo, ang aasahan niyo pong gobyerno pag tayo 'yung naging pangulo, gobyernong nilalapit ang sarili sa inyo. Hindi po ito 'yung gobyerno na naghahanap ng pahinga, maghihintay na lang sa Maynila. Ito po 'yung gobyernong kung saan kami kailangan, pupuntahan namin. Marami pong kailangan asikasuhin pero ang pangako po namin sa inyo, gobyernong tapat [crowd replies] para umangat ang buhay ng lahat.

Ano po 'yung gustong sabihin nito? Pag sinabi po nating gobyernong tapat, ang pinapangako po namin sa inyo, mga lingkod bayan na matitino at mahuhusay. 'Yung paniniwala po natin, walang pagbabagong mangyayari dito sa ating bayan pag ang gobyerno hindi matino at mahusay. Pinakita po namin ito sa Office of the Vice President. Kahit po kaunti lang ang aming pondo, marami kaming natutulungan saan mang sulok ng Pilipinas. Dito lang po sa Cebu, napakarami po naming Angat Buhay projects dito, kaya po ako dumaan sa Tabuelan saka sa Tuburan, dahil binisita po namin 'yung project natin doon. Sa Tabuelan nagbigay po tayo ng ambulansya, sa Tuburan naglagay po tayo ng solar na irrigation system para sa mga coffee farmers. Sa San Remigio, nagtayo po tayo ng mental health facility at meron tayong mental health program doon. Sa Dalaguete meron din po tayong tulong sa kanilang mental health program. Sa Medellin saka sa Daanbantayan, meron po tayong mga sustainable livelihood and training programs. Sa Carcar nagpalagay po tayo ng bagsakan center para sa mga mangunguma. Sa Naga nagpalagay po tayo ng livelihood center.

Tuwing may krisis na nangyayari dito, nandito po kami. Lahat na bagyong dumaan, lahat na bagyong dumaan kami po nauuna halos para magdala ng relief operations. Halimbawa po, noong tumama 'yung Typhoon Odette, dalawang araw pagkatapos tumama nandito na po kami. Noong panahon po ng pandemic, nagpadala po tayo ng permanent team dito para magkaroon ng COVID response operations. Marahil nabalitaan niyo na naglagay po tayong ilang rota ng mga shuttle buses para sa ating frontliners. Naglagay po tayo ng mga dormitories kung saan 'yung frontliners natin puwedeng tumira for free. Maraming ospital dito sa buong lalawigan pinapadalhan po natin ng PPE sets, ng mga medical supplies. Naglagay po tayong pondo sa ilang ospital para 'yung mga may problema sa pambayad, ay puwedeng i-charge sa pondo ng opisina namin. Naglagay po tayo ng shuttle service mula Olango island papuntang Mactan.

Bakit po namin 'yun nagagawa kahit kaunti lang 'yung pondo namin? Dahil pinapangalagaan po namin ang pera ng taumbayan. 'Yung kaunti pong meron kami, sinisiguro namin na makakarating doon sa mga komunidad na nangangailangan. Kaya po sinasabi ko ito sa inyo, dahil sa panahon ng eleksyon maraming kandidato 'yung manliligaw sa atin. Pero pag nanligaw po sa atin, kailangan 'yung boto natin, ang dapat po natin sa kanilang itanong, "Nasaan ba kayo noong wala pang eleksyon?" "Nasaan ba kayo noong kami nahihirapan at kailangan kayo?" Napakarami pong krisis ang dumaan: bagyo, sunog, pandemic, dapat ang itanong natin sa kanila, kung talagang mahal nila tayo, asan sila noong hindi pa sila kandidato?

Dahil napakadali lang po, napakadali lang magsipag kung may eleksyon dahil may kailangan sa inyo. Pero masusukat natin 'yung pagmamahal, hindi sa salita kundi sa gawa. Masusukat po natin 'yung pagmamahal pag tiningnan natin 'yung track record nila. Noong hindi pa sila kandidato, ano 'yung ginagawa nila? Dahil ang ayaw po nating mangyari, na naiisipan lang tayo tuwing may eleksyon. Dapat po may eleksyon o wala, nandiyan para tumulong. May kailangan o wala sa atin, kailangan man ang boto natin o hindi, nandiyan para iparamdam sa ating 'yung kanilang pagmamahal.

Kaya po kami, pag sinabi po naming ayaw namin sa korapsyon, mahaba po 'yung aming resibo. Ano po 'yung resibo ng opisina namin? Ang resibo po ng opisina namin, sunud-sunod na taon, ang opisina po namin nakakakuha ng pinakamataas na COA audit rating. Pagpapakita na walang korapsyon sa aming opisina. Hindi na po kami ang nagsasabi lang, COA mismo ang nagsasabi. Kaya po pag ang humihingi ng tulong sa atin nagsabi: "ayaw namin sa korapsyon", hingian po natin sila ng resibo. Dahil pa-minsan ang sinasabi, iba naman sa ginagawa.

Ito po, nagpapasalamat kami sa inyo, kahit mainit, kahit napapagod kayo kasi kanina pa kayo nakatayo, nandito pa din kayo naghintay sa amin. Malaki pong bagay para sa amin na personal niyo kaming makita, personal kaming makausap, para po makita ninyo na nandito kami tuwing kailangan ninyo. Kami po 'yung lalapit sa inyo. Hindi namin sasabihin: doon lang kami sa Cebu, doon lang kami sa Mandaue magra-rally, bahala na kayong pumunta. Kami po, kung asan kayo, doon namin kayo pupuntahan.

At mangyayari po ito, hindi lang ngayong kampanya, pero lalo na kung walang eleksyon. 'Yun po 'yung pinakita namin sa mga Cebuano. Sa anim na taon na ako po Vice President, hindi ko po mabilang kung ilang beses ako bumalik dito. Kadalasan hindi niyo alam, nandito ako, pero nandito ako para tumulong sa mga lugar na kailangan ng aming tulong. Kaya po sa lahat ng mga naging partners po natin sa Angat Buhay Program, maraming, maraming salamat. Humihingi po kami ng tulong, hindi lang po para sa akin, pero pati din sa aking Vice President, Senator Kiko Pangilinan, pati po sa ating mga senatorial bets.

Iniimbita din po namin kayo, kung sisipagan pa, hindi pa masyadong pagod, baka gusto niyo pong sumama sa amin sa Mandaue. Masaya po 'yung magiging gabi. Ang imbitasyon po natin,  hindi lang para sa mga naka-pink ngayon. Kahit mga hindi naka-pink, welcome na welcome po kayong sumama sa atin. [crowd cheers]

At ang pangako po namin sa inyo: pag tayo po naging pangulo, pangulo tayo ng lahat na kulay. Pagkatapos ng eleksyon, wala na dapat na kulay na tinitingnan. Dahil pinakamahalaga, taumbayan na nagkakaisa. Dahil pag nagkakaisa tayo, ang pagkakaisa po natin, hindi lang pagkakaisa ng mga politiko, pero pagkakaisa ng karaniwan na mga Pilipino. Talo nito 'yung lahat na makinarya, talo nito 'yung pera, dahil kung puso saka sipag 'yung ating iaalay, walang makakatalo sa atin. Kaya po maraming, maraming salamat sa inyo. Mabuhay po kayong lahat.

"Overthinkers for Leni." Maraming salamat. "LENIsin 2022 Movers Leni-Kiko." "Sa tapat na gobyerno, aasenso tayo." Maraming salamat. Uy, may ka-birthday ako dito. "Magbi-birthday ako on April 23 with VP Leni." Birthday po namin sa Sabado. "[inaudible] for Leni." “LENIsin Movers." "Giluanons for Leni." "Good Governance Cutie." "Nago-online class for Leni." "Maging kritikal, huwag maging panatiko, kaya si Leni-Kiko ang boto ko." "The best man for the job is a woman." "Leni-Kiko set the standards so high that only Leni-Kiko qualifies." "Undecided sa life, desidido kay Leni." Ano ito? "Leni bring the sadbois out." [crowd cheers]

"[speaks in local dialect]." "Mga baliw kay Jungkook for Leni." Ano ito? "Luzviminda–" Ano 'yun? HK ba 'yun o NK? Ah. "Luzviminda Hong Kong for Leni-Kiko." "Sabihin niyo mang lugaw, pero sa plataporma kayo mapapa-wow." "ML player for Leni. Tank user here." "Leni is the [inaudible]." "Kung si VP Leni ang ma-presidente, daog na ta te." Meron akong kuwento sa inyo, 'di ba bikolano ako? Ang gustong sabihin sa amin ng "daog", talo. Ngayon alam ko ang gustong sabihin ng "daog" dito, panalo. Pero noong una akong sinabihan na "daog na ta," natakot ako. Ngayon na alam ko na, maraming salamat. Oh ito, binibigyan ako ng credit card. "Withdraw ka for VP, Ma'am Leni, kasi qualified ka for president." [crowd cheers]

"VP Leni, tapos na ako sa assignment ko. My family is for you. -DOST scholars for Leni." Ano ito? "Kiko-ntrahan ka man nila, ang [speaks in local dialect]." "Kasing–" Ano ito? "Kasing nipis pala ng o-zone layer ang ego ng mga sadbois na bitter." Hindi na. Huwag na tayo mag away-away. Nandito tayo lahat para mahalin ang bansa natin. "VP Leni, [speaks in local dialect]." [crowd cheers]

"VP Leni, kayo ay ipinagmamalaKI-KO." Ayan. "Sa gobyernong tapat, may re-Cebu lahat." "VP Leni, kalabisan ba kung sa graduation, hilingin kitang makapunta?" Bakit hindi? Basta imbitado ako. "Education students for Leni." "Let Leni Lead. Qualified. History. Service. Platform. Values." "Leni-Kiko para sa [speaks in local dialect]." "Leni supporter for today's vidyow." "Bahala bobo basta pink akong boto." Kayo, ha? Baka binebenta niyo na ako. "VP Leni, pa-picture po. Mag-module pa ako." Lapit na po dito. Ano ito? "Hello, future President and Vice President! - Mga takas na [inaudible] for Leni-Kiko 2022." "I just wanna ask VP Leni: Will you be my president? Yes or No?" Ang Leni daw, "Lawyer, Ekonomista, Nagmamahal, I miss you na, malala." Kanino 'yan, ano, naka-address? "Mama Leni, pa-pirma po ng certificate of adoption." Oh, picture po. Ayan. Hindi na po tayo magtatagal dahil pupunta pa tayo sa Mandaue. Pero maraming, maraming salamat sa inyong lahat. Maraming salamat po sa organizers. Mabuhay po kayong lahat.

[crowd chants: "Leni! Leni!"]

[END]