< Back to Transcripts

Message of Vice President Leni Robredo at Siquirose: Leni-Kiko People's Rally, Larena, Siquijor

April 20, 2022
Larena, Siquijor
No items found.

VP LENI: Magandang hapon! Magandang hapon, Larena. Magandang hapon, Siquijor. Magandang hapon po sa aking partner, ang atin pong susunod na Vice President, Senator Kiko Pangilinan. Ang atin pong Mayor, Mayor Dean Villa. Ang atin pong former Congressman Orlando Shane Fua Jr., Ms. Jean Flor Villafuerte, Attorney Edwin Uy. Yu pala. Attorney Edwin Yu. Tatanda din kayo.

Nandito din po, former Congressman Rav Rocamora. Ang atin pong mga volunteers na nandito ngayon. RPC Siquijor, RPC Negros Oriental, RPC Zamboanga, Siquijor Youth for Leni-Kiko, Local Government Unit of Larena, San Juan Youth for Leni-Kiko, Lazi Youth for Leni-Kiko, Maria Youth for Leni-Kiko, Larena Youth for Leni-Kiko, Enrique Villanueva Youth for Leni-Kiko. Oh, RPC Australia, mga balikbayan. Alyansa saka kanina po kasama ko sila, Poor Claire Sisters of Our Lady Divine Providence. Ayun, maraming salamat sa inyo, kahit mainit, nandito kayo, naghihintay.

Alam niyo po, ilang beses na akong naka-balik sa Siquijor pero first time kong makapunta dito sa Larena. Kaya maraming maraming salamat po sa Larena for the very warm welcome. “Ang ganda ng Siquijor, kasing ganda ng presidente ko,” “Mga ka-isla for Leni,” “Ga-graduate ako na si Leni ang presidente ko,” “Mga wala pang tulog for Leni-Kiko,” “Future Nurses for Leni,” “Pa-good luck naman kay VP Leni, may exam pa ako mamaya.” Good luck. “BBM Youth Leader for Leni-Kiko,” “Siquihiknon for Leni,” “Iska for Leni,” “Pa-picture Leni, flex ko lang sa teacher kong BBM.” Halika na. Ayan ha, siguraduhin mong mako-convert ang teacher mo.

Okay. “Kung kaya ni Mama Mary, kaya rin ni VP Leni.” Hindi natin kaya si Mama Mary. “Sa gobyernong tapat, pati mga apologist aangat,” “Science High Students for Leni-Kiko,” “Science High Students and Alumni for Leni-Kiko,” “Ma’am pwede bang pa-pic, may 10 missed calls na po nanay namin.” Hinahanap na kayo, hindi ba kayo nagpa-alam? “Professional Marites puhon for Leni,” “Pink na boto for today.” Okay lang po, okay lang. “Pink na boto for today’s video,” “Accountancy students for accountable leaders,” “April babies for Leni-Kiko,” “Advance happy birthday, VP Leni.” Sa sabado pa pero thank you.

“Ang pag-withdraw ay pag-iwas sa pregnancy, hindi for presidency.” Ano ba ‘yan, ano ba ‘yan. “Isla del Fuego para kay Robredo,” “Pink akong boto,” “Gobyernong tapat, hindi pa ba ako sapat?” Meron siyang hugot. “Island boys for Leni,” “Donny Pangilinan ng Siquijor.” Sige nga, tignan nga natin. Tignan nga natin si Donny ng Siquijor. Pogi naman, pogi naman. “I love you, Mama Leni pa-picture please.” ‘Yung mga magpapa-picture lapit na po. “APEC Partylist supports Leni-Kiko.” Maraming salamat sa APEC Partylist.

Ang ating mga Electric Cooperatives, maraming salamat po. “Pa-selfie VP Leni.” Okay po maya-maya. “You can not put a good woman down.” Ano ito? Ano ito? Hindi ko nababasa. Mahina po para. Ah “Waste workers for Leni.” Maraming salamat. “VP pa-picture,” “Fan ni Rocco at sa nanay niya.” Ang Rocco po, aso namin. Pati aso namin merong fans. “Kiko, ang original green. Kiko ang sure na win.” Siguraduhin natin ‘yan ha, dito sa Siquijor.

Ayan baba muna natin. Baba muna natin ‘yung mga placards para makakita ‘yung nasa likod natin. Meron pa doon, “The intellegent choice,” “Sa tapat na gobyerno, aasenso tayo.” Maraming salamat. Ano iyon? Ano iyon? “Kapitan [inaudible] for Leni.” Kapitan, thank you very much po. Ano pa. Meron kang cheerleader dito Kap. Maraming salamat.

Sa atin pong mga barangay officials na nandito, maraming salamat sa inyo. Nasaan po? Ah, mga Sisters. Hi, Sisters! Magkasama na po kanina pero maraming salamat, maraming salamat po.

Ayan. Ito po, masaya ako dahil naka-bisita ako ulit sa Siquijor. Gaya po ng sabi ko kanina, hindi po ito first time. Ano ‘yan, medic? Ah. Mga medic, maraming salamat. ‘Yung nangangailangan ng medical assistance. Maraming salamat po sa volunteer medics natin. Maraming salamat sa inyo. Ayan, ‘yung sinasabi ko po kanina– mamaya, mamaya. Magsasalita muna ako kasi baka pag-alis ko sabihin niyo, ano ba ‘yung sinabi niya? Ano ba ‘yung mensahe niya? Hindi niyo maaalala.

Pero uunahin ko lang ito kasi ‘yung seniors natin nandito. ‘Yung seniors po natin, ano ‘yung programa natin sa seniors? Ang programa po natin sa seniors, unang-una ang pagbigay ng pension para sa lahat, walang pipiliin. Lahat ng seniors magkakaroon ng pension. Kulang na kulang ang natatanggap ngayon, kulang pang pambili ng gamot. Kaya dodoblehin po natin ‘yung inyong pension para hindi na problema ‘yung pambili ng gamot.

Pero hindi lang iyon. Sisiguraduhin po natin, na hindi magiging hadlang – baba muna natin para nakikita tayo ng seniors, mamaya na ‘yan. Nako-cover kasi ‘yung seniors. Sisiguraduhin po natin na hindi magiging hadlang ang kahirapan, pag kayo may nararamdaman. Kapag kayo may nararamdaman, ‘yung Medical Assistance Program natin, sisiguraduhin nating available para sa lahat, hindi lang ‘yung sa mga may kayang mag-bayad.

Ang ating pong programa para sa mga magsasaka at mangingisda, siguro nasambit na kanina ni Senator Kiko, tututukan po natin para ‘yung ating sektor ng agrikultura ay mabibigyan natin ng diin dahil ngayon hirap na hirap ang ating mag magsasaka dahil sa kamahalan ng mga inputs lalo na ng abono. Sisiguraduhin po natin na hindi kayo maiiwan dahil 'yun naman talaga 'yung matagal na nating pinaglalaban.

Ang pinaglalaban po natin mula pa noon na sisiguraduhin natin na ang inaalagaan natin, first and foremost, ang mga nasa laylayan ng lipunan. Ano pong gustong sabihin ng gobyernong tapat? Ang amin pong pangakong gobyernong tapat, sisiguraduhin po namin sa inyo na ang ating mga lingkod-bayan matitino at mahuhusay. Anong gustong sabihin ng matino at mahusay na mga lingkod-bayan?

Kami po ni Senator Kiko, pareho kaming matagal nang naninilbihan pero ang aming mga pangalan ay nungkang nadawit sa anuman na anomaliya. Ang opisina po namin, Office of the Vice President, taun-taon natatanggap ang pinakamataas na COA Audit Rating. Ano po ang gustong sabihin? Anong gustong sabihin ng mataas na COA Audit Rating? Gustong sabihin, maayos 'yung mga proseso namin. Gustong sabihin, pinapangalagaan namin ng mabuti ang pera ng taumbayan.

Ano po ang gustong sabihin nito? Ang gustong sabihin nito pag napapangalagaan natin ang pera ng taumbayan, walang nahuhulog sa korapsyon kaya nakakapagsilbi tayo sa mga mahihirap.

Bawat eleksyon, maraming nangangako. Alam ko po ang Siquijor hindi parating binibisita, di ba? Bakit kaya hindi parating binibisita ang Siquijor ng mga politikong nasyonal kahit pa napakaganda ng lugar ninyo? Bihirang mabisita dahil konti ang botante dito. At 'yun 'yung diperensya ng ating pulitika. Pag konti ang botante, hindi na inaasikaso ng national government officials ang lugar.

Kami po sa Office of the Vice President mas malayo, mas maliit, mas mahirap puntahan, mas lalo kaming nandiyan. Lahat– saan mang sulok ng Pilipinas, lahat na sakuna halos lagi kami 'yung nauunang pumunta. Halimbawa po, 'yung pandemic, 'yung ating mga doktor ang makakapagsabi. Nagpapadala po kami dito sa inyong lalawigan ng mga PPE sets, ng mga medical supplies para siguraduhin na 'yung medical front liners natin naasikaso.

Alam ko pong marami pang problema. Malaki na po 'yung pinagbago ng Siquijor mula noong huli akong pumunta dito ng 2019. Pero alam ko marami pa kayong ninanais para dito. Halimbawa na lang, ninanais niyo sa– na sana hindi na lagi nagba-brownout di ba? Ninanais niyo na sana mas maayos 'yung internet connection. At ramdam na ramdam niyo 'yun lalo na noong nag-virtual 'yung mga klase dahil napakahirap pumasok na hindi dependable 'yung internet connection.

Alam po natin na hinahanap natin maraming oportunidad sa hanapbuhay. At ang akin pong pangako sa inyo 'yun 'yung mga tututukan natin pag tayo naging Pangulo. Personal 'yung pagtutok natin, pagsiguro na lahat na lugar sa Pilipinas, maaasahan ang kuryente, maaasahan ang internet connection dahil po ngayon kailangan na kailangan na ito.

Maaasahan po ng mga magsasaka, ng mga mangingisda, ng mga seniors, ng mga kababaihan na hanggang gusto nilang magtrabaho may trabahong available para sa inyo. Kasi 'yun 'yung parati nating problema. Masipag naman tayo, gusto naman natin magtrabaho pero kulang 'yung oportunidad sa magandang trabaho.

Ngayon dito maraming mga kabataan. Ano po ang pangako natin para sa mga kabataan? Pagupong-pagupo natin magde-declare na tayo ng education crisis. Bakit kinakailangan na mag-declare tayo ng education crisis? Dahil po 'yung datos luging-lugi na 'yung ating mga estudyante. Ang lahat ng mga international assessments lagi tayong nasa hulihan. Ngayon pong pandemic naglalagay kami ng mga Community Learning Hubs. Ang isa pong nadiskubre namin, Grade 5, Grade 6 na mga estudyante hindi pa din nakakapagbasa ng maayos.

Pagganito po 'yung ating mga estudyante, kawawa sila pag maghahanap na sila ng trabaho. Aaasikasuhin po natin. Papano natin aasikasuhin? Ang una nating aasikasuhin 'yung ating mga teachers. 'Yung mga teachers po natin kailangan competitive 'yung kanilang mga suweldo. Kailangan po nade-deload na sila. Dapat ang atensyon ng mga teachers natin sa pagtuturo na lamang. Ngayon nauubos 'yung oras nila sa mga admin matters saka mga paperwork. Kailangan po binibigyan natin ng pagkakataon 'yung mga teachers natin na nakakapag-aral para paghusayin ang sarili na hindi sila nawawalan ng trabaho dahil lang gusto nilang mag-aral.

Aasikasuhin po natin 'yan lahat para pagsiguro na pag kayong mga kabataan nakatapos, maayos na trabaho 'yung makukuha ninyo. Pag hindi po natin naayos ang ating education system, lagi lang kayong underemployed dahil 'yung skills ninyo hindi akma sa hinahanap ng trabaho.

Ito po sa healthcare system natin sisiguraduhin natin lahat na probinsya at least may tertiary hospital para po hindi niyo na kailangang pumunta pa sa ibang lugar para lang magpagamot. Pag kayo may mga emergency sa ospital niyo dito maaasikaso na kayo, may pera man kayo o wala.

Pero ang atin pong mga pangako hindi natin ito matutupad kung hindi niyo kami sasamahan sa laban. Nagpapasalamat po tayo sa mga volunteers natin. Alam po namin na kahit wala pa kami dito, ang dami niyo nang ginagawa para tulungan tayo sa kampanya.

Pero isang paalala lang, marami dito sa ating naka-pink pero dapat ang ating puso bukas kahit hindi sa kakampi. Dahil tayo po, pag tayo naging Pangulo wala tayong kulay na titignan. Magiging Pangulo tayo ng lahat na tao iba man ang kulay na dala-dala nila at 'yun din ang hinihingi namin sa inyong mga volunteers. Kahit po hindi Kakampink, mahalin natin sila. Kahit po iba 'yung kulay na gamit, mahalin natin dahil sa dulo ng lahat magkakapatid tayo. Tulong-tulong tayo sa pag-ayos ng ating bayan.

Napakahalaga po ng eleksyon na ito. Ang eleksyon na ito, hindi lang contest ng mga kandidato pero ang eleksyon na ito ang magsasabi anong klaseng gobyerno pa ang magkakaroon sa bansa natin sa susunod na anim na taon. Kung sino po 'yung pipiliin natin, anong klaseng pamahalaan 'yung kaniyang irerepresenta.

Kami po klaro sa inyo kapag tinignan niyo po 'yung aming track record ni Senator Kiko. Ang klase ng pamahalaan na matagal na naming isinusulong: pamahalaan na inuuna 'yung mga maliliit na tao. Isang klase ng pamahalaan na walang korapsyon. Isang klase ng pamahalaan na nakikinig. Isang klase ng Pangulo na kasama kayo dito sa Siquijor, hindi 'yung hindi kayo nabibisita.

Kaya po ko nagpapasalamat ako. Mahaba pa po 'yung araw namin. Galing na po kami sa north saka sa south, nag-Negros Oriental, pagkatapos po dito babalik kami dahil may dalawang rallies pa sa Dumaguete. 'Yung gusto pong sumali sa atin sa Dumaguete, welcome po kayong sumali. Pero 'yung hindi na sa atin– 'yung hindi na po sa atin makakasama doon, nagpapasalamat kami at sinamahan niyo kami ngayon.

Gaya po ng dati pabalik-balik lang kami dito sa Siquijor. Pag oras ng pangangailangan nandito po kami, kasama niyo sa lahat na oras. Mabuhay po kayong lahat. Maraming-maraming salamat.

[END]