< Back to Transcripts

Message of Vice President Leni Robredo at Paglaem: Palawan People’s Rally Puerto Princesa Baywalk Park, Puerto Princesa City, Palawan

April 6, 2022
Puerto Princesa City, Palawan
No items found.

VP LENI: Magandang gabi, Palawan! Kumusta kayo? Sino ba 'yung basa dito? Grabe, kanina paglapag namin ang lakas ng ulan. Akala namin nagsi-uwian na kayo. Pero maraming maraming salamat. Alam ko po na hindi lang mga taga-Puerto Princesa ang nandito, pero maraming galing sa mga malalayong lugar. Ayan. Meron ba ditong taga-Culion? Meron bang taga-Coron? Meron bang taga-Linapacan? Taga-Busuanga? Taga-Cuyo? Taga-Agutaya? Taga-Magsaysay? Taga-El Nido? Taga-Taytay? Taga-Roxas? [crowd cheers] Taga-Roxas ba kayo? Galing ako sa inyo noong December. Taga-San Vicente? Taga-Araceli? Taga-Narra? Taga-Narra kayo? Taga? Pasensya na mahina na 'yung mata ko. Taga-Quezon? Taga-Aborlan? Taga-Rizal? Taga-Española? Taga-Bataraza? Taga-Balabac? At taga-Brooke's Point?

Ayan. Magpapasalamat po ako sa lahat ng mga volunteer groups na tumutulong po sa akin. Kanina po, inisa-isa na kayo ni Senator Kiko. Hindi ko na po mauubos lahat, pero gusto ko lang pong banggitin: RPC Palawan, maraming maraming salamat. Nandiyan po sila sa may likod kanina. RPC Youth Palawan. Palawenyos for Leni-Kiko. TLR Palawan. Tangay ni Leni at Kiko. Youth for Leni-Kiko. LGBTQIA+ for Leni-Kiko. At iba pa pong mga grupo, maraming maraming salamat sa lahat pong pagod ninyo. Sa lahat ng sakripisyo ninyo, maraming salamat. Sa mga nagpa-ulan, anong oras pa ba kayo nandito? [crowd cheers] Ang iba ala-una, ang iba alas-dos, ang iba alas-tres. Gustong sabihin, kanina pa kayo nakatayo. Sino pa 'yung mga gutom na dito? Pagod, gutom, basa, pero nandito pa din kayo. Kaya maraming maraming salamat.

Pero 'yung pagpasalamat ko– nakita ko Future Lawyers For Leni, maraming salamat. Pero po kahit pagod, gutom, basa, nagsasakripisyo dahil sa pagmamahal sa ating bayan. Kaya maraming maraming salamat sa inyo. Alam ko po na 'yung pagod niyo hindi lang ngayong araw, hindi lang ngayong gabi. Pero marami sa inyo nakikita ko po ito sa Facebook, marami 'yung marami nang ginagawa mula pa noong nag-announce tayo noong October. Meron sa inyong nagmo-motorcade, merong nagpapalugaw, merong nagha-house to house, merong kung anu-anong ginagawa para lang masiguro na mapakilala kami ni Senator Kiko at ang ating mga senador dito sa inyo sa Palawan.

Ito po noong 2016 noong ako ay tumakbo, napakalaki ng boto na nakuha ko dito sa inyo. Kaya po maraming maraming salamat sa lahat ng naging dahilan kung bakit sinamahan ako ng Palawan. Noong panahon pong nagkakandidato ako noong 2016, baguhan ako. Hindi niyo pa ako kilala, wala pa akong napapakita sa inyo, pero tiniwalaan niyo na ako, tinulungan niyo na ako. Pero ngayon po, nangako ako sa inyo noong pumunta ako dito noong 2016. Sinabi ko po sa inyo na kung ibibigay niyo sa akin 'yung inyong tiwala, pagsisilbihan ko 'yung pinakamalalayo, pinakamahihirap sa ating mga kababayan. Kahit wala pa po akong napapakita sa inyo, tinulungan niyo ako. Pero ngayon po, matitingnan ko kayo mata sa mata, puwede ko pong sabihin sa inyo na 'yung anim na taon na ibinigay niyo sa akin, ginawa ko ang lahat para makapagsilbi sa inyo.

Dito po sa Palawan, marami po tayong mga projects na ginawa at binaba. Kakaupo ko pa lang po bilang Vice President, pumunta na po tayo sa Agutaya. Meron ba ditong mga taga-Agutaya? Taga-Agutaya kayo? Wala? Taga-Agutaya kayo? Ayun. Alam po ng mga taga-Agutaya, pinakauna ko pong punta doon, pumunta ako sa Barangay Diit. 'Yung pangalawa ko pong punta doon, pumunta ako sa Barangay Algeciras. Pero hindi lang po itong dalawang barangay 'yung binabaan namin ng proyekto, meron pa pong tatlo pang ibang barangay. Tama. Maraming resibo. Ano po 'yung mga tulong na dinala natin doon, hindi lang po sa Agutaya, pati din sa Coron, pati din sa Culion? Iba-iba.

Nagkaroon po tayo ng feeding programs, nagtulong po tayo sa mga school children, naglagay po tayo ng mga solar kits para ma-energize 'yung mga barangay dahil wala pang kuryente. Tinulungan po natin 'yung mga seaweed farmers para po ma-improve 'yung kanilang produkto at gumanda 'yung kanilang hanapbuhay, nagbigay po tayo ng iba't ibang mga livelihood programs para sa kanila. Nagbigay po tayo ng mga motorboats, nagbigay po tayo ng fiber boats para makatulong. Hindi lang po 'yun. Maliban po doon sa mga binaba natin na livelihood doon po sa taas, sa northern part ng Palawan, noong nagkaroon po ng pandemic dito, nagbaba po tayo dito ng tulong. Noong umpisa, 'yung tulong po natin mga PPE sets lamang, mga medical supplies sa halos lahat na ospital dito sa Palawan pero noong grumabe po 'yung mga kaso dito, bumaba dito 'yung team natin at nagpapasalamat po ako sa lahat na partners na tinulungan po tayo para ma-roll out natin 'yung ating medical assistance program dito.

Ito po 'yung panahon na nawawalan na tayo ng mga ospital, kulang na 'yung mga hospital beds, partner din po natin 'yung City Government of Puerto Princesa saka po 'yung iba't ibang mga civic organizations dito para po ma-roll out natin 'yung programa. Noong December lang po, pagkatapos na pagkatapos ng typhoon Odette, tumama po 'yung typhoon Odette, December 16. Umikot po ako sa lahat na Odette stricken areas, December 22 nandoon na ako sa inyo di ba? Nandoon ako sa San Vicente saka sa Roxas, pumunta ako ng San Vicente saka sa Roxas para magkaroon ng relief operations at nagpapasalamat po ako sa ating mga youth groups na tinulungan po tayo ma-roll out 'yung ating mga tulong para sa mga nasalanta ng bagyo.

Pero bakit ko po ito sa inyo iniisa-isa ngayon? Dahil sa panahon ng eleksyon, marami pong kandidatong pupunta dito sa inyo para hingiin ang inyong tulong. Marami sa kanila magsasabi, hindi nila papabayaan ang Palawan, marami sa kanilang magsasabi, “Mahal namin ang Palawan.” Pero tanungin po natin sila: Noong panahon na kinakailangan niyo sila, nasaan sila? [crowd cheers] Tanungin niyo po sila dahil kadalasan, marami lang 'yung gustong tumulong pag panahon ng eleksyon. Kadalasan binibisita lang tayo para humingi ng tulong pero pag tayo na 'yung nangangailangan, napakahirap hagilapin. Kaya sa akin po, bawat isang pupunta dito, pati po kami na humihingi ng inyong tulong, tanungin niyo dapat kami: “Papaano namin masisiguro na 'yung pinapangako niyo, papanindigan niyo pag kayo ay nanalo na?”

Kami po ni Senator Kiko pag sinabi po naming ang aming pangako sa inyo, gobyernong tapat, mahaba po 'yung aming resibo. Si Senator Kiko po mula 2001, government official na hanggang ngayon, pero ni isang anomaliya, wala pong naidikit sa kanyang pangalan. Malinis na paninilbihan at malinis ang pagiging public servant, 'yun po 'yung gustong sabihin ng gobyernong tapat. Ang amin pong pangako sa inyo na 'yung mga lingkod bayan sa ilalim ng aming administrasyon, matitino at mahuhusay. Ako po, hindi naman sa pag-aakyat ng aking bangko– pag-angat ng aking bangko, hindi na po kami 'yung nagsasabi na malinis kami, COA na mismo. Sa tatlo pong sunod-sunod na taon, ang Office of the Vice President, nakakakuha ng pinakamataas na COA Audit Rating, gusto pong sabihin nito, malinis 'yung pamamalakad.

Kaya nga po kahit napakakaunti lang ng aming budget, nakakarating kami sa Agutaya kahit napakahirap puntahan, nakakapagbigay po tayo ng mga programa. Dito po sa Puerto Princesa, nagkaroon din po tayo dito ng partnership with Astoria, tinutulungan po natin 'yung ating mga IPs dito. Pero 'yung sa akin po, 'yung trabaho hindi naman 'yan kailangan ipangalandakan. Marami po kami nasasabi, marami ang hindi nakakaalam, pero sinasabi po namin 'yan ngayon, ngayon pong nagkakampanya na kami dahil 'yan po 'yung aming resibo. At 'yung taumbayan, kailangan bago kami humingi na naman ng tulong ninyo, kailangan po naming ipakita sa inyo 'yung aming resibo.

Alam niyo naman po na 'yung lalawigan niyo, napakaganda. Sigurado po ako, proud na proud kayo na mga Palaweño kayo. Ang Palawan po, sinasabi last ecological frontier, dito sa Pilipinas, di ba? 30% ng lahat na mangrove sa Pilipinas, nandito sa inyo. 40% ng lahat na coral reefs ng Pilipinas, nandito sa inyo. 50% ng lahat na forest dito sa Pilipinas, nasa Palawan, at dahil ganoon, pag kami po ni Senator Kiko 'yung inyong tinulungan, ang priority po natin dito talagang proteksyon ng kalikasan. Dahil pag amin pong pinangalagaan ang inyong kalikasan, ang balik din niyan ay sa inyo. 'Yung kabuhayan para wag magutom, 'yung proteksyon ng ating mga buhay, 'yung pinagkukunan ng iba't ibang mga yamang lupa at yamang dagat, na tayo din 'yung magbebenepisyo.

Pero ito po, wala po kaming sinasabi na nasa amin 'yung lahat na solusyon. Mangyayari lang po 'yung lahat na pangarap natin para sa bayan natin, pag tayo ay magtulung-tulungan. [crowd cheers] Pero ang taumbayan tutulong lang siya, aambag lang siya pag may tiwala siya sa kanyang pamahalaan. [crowd cheers]  Ang Office of the Vice President po, bakit ba napakarami naming nagagawa? Maliban sa pinapangalagaan namin 'yung pera ng taumbayan, pinapangalagaan namin 'yung aming pangalan kaya maraming nagtitiwala sa amin na mga private sector. Marami po kami nagagawa dahil sa private sector. Ngayon nakikita niyo 'yun sa kampanya. Kakaiba 'yung kampanyang ito.

Napapansin niyo ba? [crowd cheers] Noong mga nakaraan pong kampanya, lahat na trabaho nasa kandidato at nasa National Campaign Headquarters. Lahat. Pero ngayon, baliktad. Ngayon po, kayong mga volunteers ang gumagawa ng lahat. Itong rally natin ngayong gabi, dahil ito sa inyong pagod. 'Yung lahat ng mga activities natin, nagagawa kahit wala kami dahil sa inyo. Pero bakit niyo ginagawa ito? Ginagawa ninyo dahil tumitiwala kayo. Tumitiwala kayo na hindi masasayang 'yung inaambag niyo.

Ito po 'yung sinasabi natin na pag-asa. Ang pag-asa ang magbibigay ng ilaw sa ating lahat. Ito 'yung pinagmumulan ng ating mga energy. Kasi kung hindi naman kayo inspired, magpapabasa ba kayo ng ulan? [crowd cheers] Di ba kung hindi kayo inspired, magtiya-tiyaga ba kayo na ala una palang nandito na kayo, hanggang ngayon nandito pa din kayo? Pero ginagawa niyo 'yun kasi alam niyo may papapuntahan 'yung sakripisyo ninyo. At 'yun po 'yung pangako namin ni Senator Kiko sa inyo. Ang pangako po namin sa inyo, isang gobyerno na maglalarawan ng mga pinapaniwalaan ninyo. Isang gobyerno na makikinig sa inyo. Isang gobyerno na papahalagahan ang lahat na ambag ninyo.

Madali lang pong mangako ng trabaho, madali lang magpangako ng mga programang pangkalusugan, madali lang pong magpangako ng programang pang edukasyon, aayusin ang ekonomiya, pare-pareho naman 'yung naririnig natin, di ba? Galing sa mga kandidato, laging ganoon 'yung mga pangako. Kahit po kami, pinapangako din namin 'yun sa inyo. Pero mas malalim 'yung aming pinapangako. Ang pinapangako po namin: gobyernong tapat, 'yung magdadala ng mga pagbabagong inaasam ninyo.

Paminsan po– ano 'yun? Pasensya na, medyo malayo na kayo, hindi ko na naririnig masyado. [crowd cheers] I love you, too. Ayan. 'Yung sinasabi ko lang po, laban natin ito. Hindi ko lang po ito laban, hindi lang ito laban ni Senator Kiko, ang eleksyon pong ito hindi lang tungkol sa sino ba 'yung mas gusto nating kandidato. Pero ang eleksyon pong ito ang makakapagsabi kung may aasahan na ba talaga tayong pagbabago. Bawat eleksyon umaasa tayo. Pero kadalasan 'yung pag-asa natin, nadadala naman sa wala. Pero ngayon po, meron tayong aasahan dahil kabahagi na kayo ng ating pamahalaan. Ang hinihingi ko pong tulong, hindi lang para sa akin. Pero ang hinihingi ko pong tulong, lalong-lalo na pati din po sa aking partner, palakpakan po natin, ang ating Vice President, Senator Kiko Pangilinan. [crowd cheers] Ang ating pong mga sentorial candidates: Senator Leila De Lima, Senator Risa Hontiveros, Senator Sonny Trillanes, Senator Dick Gordon, Attorney Sonny Matula, Attorney Alex Lacson, Congressman Teddy Baguilat. Puwede po ba namin maasahan ang inyong tulong sa susunod na eleksyon? [crowd cheers]

Meron pa po tayong mahigit 30 days bago mag-eleksyon. Marami na po tayong pagbabagong nakikita. Nakikita na natin ang liwanag sa dulo ng kadiliman. Kung handa po kayong makipaglaban kasama namin– handa ba kayo? [crowd cheers] Kung handa po kayo, mananalo po tayo.

Kaya po, tara na, ipanalo na natin ito. Maraming maraming salamat.

[crowd cheers and chants “Leni! Leni!”]

VP LENI: Maraming salamat. Maraming salamat.

VP LENI: Sandali po, nakalimutan ko, Dean Chel Diokno.

[crowd cheers]

VP LENI: Pasensya na.

[END]