< Back to Transcripts

Message of Vice President Leni Robredo at LaBantayan People’s Rally Bantayan Plaza, Bantayan Island, Bantayan, Cebu

April 21, 2022
Bantayan, Cebu
No items found.

VP LENI: Maayong Buntag, Bantayan. Ayun, sobrang saya ko, nakabalik ako dito sa inyo pero bago po ako magpatuloy, ang akin pong pagbigay galang sa atin pong susunod na vice president, palakpakan po natin, Senator Kiko Pangilinan. Nagbibigay galang din po tayo kay Santa Fe Vice Mayor Oming Espinosa, kasama po natin sa stage. Maraming salamat din po sa lahat na volunteers, kasama ko po sila, ang iba sa kanila sa likod, ang iba nandito sa unahan. Ang atin pong Bantayan Island coordinator, Ma'am Frankie Despi, palakpakan po natin. Ito po 'yung mga walang tulog. 'Yung atin pong municipal coordinators, Alex Mansueto para sa Bantayan, EJ Ursal, saka Darma Santillan para sa Santa Fe, Angel Teres para sa Madridejos. Maraming salamat din po kay Rev. Fr. Jun Agravante. Ang atin pong LaBantayan rally ay binubuo ng maraming mga grupo, Bantayan Island volunteers for Leni-Kiko, Youth for Leni, Cebuanos for Leni-Kiko, at Leni Lugaw group. Masarap ba lugaw niyo ngayong araw?

Ayan, hello po sa mga delegates natin galing sa mga munisipyo, hindi lang po dito sa Bantayan pero pati din sa Santa Fe, meron ba dito mga taga-Santa Fe? Kasama ni Vice Mayor Oming. Nasaan po 'yung mga taga-Madridejos at nasaan 'yung mga taga-Bantayan? Nandito din po ang ating LGBTQIA+ sector, ang atin pong senior citizens, ang atin pong mga fisherfolks, ang atin pong mga mangunguma, mga kababaihan, mga kabataan, sa inyong lahat, maayong buntag ulit.

Alam niyo po, nandito na po kami sa Cebu noong February 24 pero 'yung ikot po namin 'yung February 24, nandoon po tayo sa Southern portion ng Cebu. Nag-umpisa po tayo sa Argao, lumipat tayo sa Toledo, lumipat po tayo sa Talisay, nagkaroon tayo ng grand rally sa Cebu City. Ngayon naman, baliktad, nag-uumpisa po tayo dito sa Bantayan, lilipat po tayo sa Bogo, sasaglit po ako sa Tabuelan, sa Tuburan, bago sa rally sa Danao, pero mamayang gabi may grand rally po tayo sa Mandaue City.

Pero bakit po tayo hindi nakukuntento na doon na lang sa grand rally? Mas madali sana 'yun sa amin ni Senator Kiko, hindi na kami masyadong mapapagod, papapuntahin na lang 'yung mga tao doon. Pero hindi po ganoon 'yung klase ng pagmamahal na gusto nating ipangako sa inyo. 'Yung pamamahala pong pinaniniwalaan natin, dapat 'yung mga lingkod-bayan, siya 'yung pumupunta sa tao dahil pag 'yung mga lingkod-bayan hindi sinasadya 'yung mga tao, lalo na po sa mga malalayong lugar, hindi niya mararamdaman 'yung kahirapan na pinagdadaanan ninyo.

Kanina lang po, kausap ko po 'yung ibang doktor sa likod. Ang sabi po nila sa akin, napakahirap ng healthcare dito dahil sa layo ninyo. Pag merong mga emergency, lalong lalo na pag kailangan ng espesyalista at masama ang panahon, delikado sa buhay ng kahit nino man.

Kaya po, ano 'yung pinapangako namin? 'Yung pinapangako po namin sa inyo, lalo kayong malayo sa sentro, lalo kayong bibigyan ng tulong. Lalo po kayong malayo, sisiguraduhin natin na kung ano 'yung mga serbisyo na available doon sa mga nasa sentro, available din dito sa inyo. Sa mahabang panahon ko po bilang vice president, ganoon po 'yung ginawa natin. Sa mga malalayong lugar, doon natin kino-concentrate 'yung ating mga proyekto.

Alam ko po, dito sa Bantayan, sa Santa Fe, sa Madridejos, maraming mga pangangailangan, isa doon 'yung mga pangangailangan ng mga mangingisda, ang pangangailangan ng mga seafarers. Kausap ko po kanina si kapitan sa likod, hindi po kami nakapag-usap nang maayos pero kinikuwento niya po na marami na mga seafarers dito sa inyo. Hindi ko alam kung napanood niyo na saka nabasa niyo na 'yung akin pong Hanapbuhay Para Sa Lahat program, pero 'yung sa Hanapbuhay Sa Lahat program po natin, isa sa mga local industries na bibigyan natin ng focus ay 'yung maritime saka fisheries sector.

Bakit po ganito? Dahil ang maritime saka fisheries, ito 'yung oportunidad para sa atin kaya dapat ginagastusan ito ng gobyerno. Ito pong maritime, 'di ba po sa Office of the Vice President, nagkaroon po tayo ng mga proyekto para tulungan na magkaroon ng maritime track ang mga public high schools? Nakapagumpisa po tayo sa Bulan, Sorsogon at 'yung plano po natin, lalo natin itong i-eexpand pag binigyan tayong pagkakataon maging pangulo ninyo.

Dahil pag ang atin pong mga seafarers ay properly trained na 'yung standards ng ating training saka education, ito po 'yung according to international standards, 'yung pagkakataon ng ating mga seafarers na magkaroon ng mas mataas na antas sa seafaring, mas mataas na sweldo, binibigay po natin sa kanila dahil tinutulungan natin sila. Maraming salamat.

Ito po alam niyo, sobrang nata-touch ako na kahit napakaaga pa, malalayo 'yung pinanggalingan ng iba, nandito kayo nagpapa-init. Ang iba po sa inyo, kanina pa nakatayo. Pero alam niyo po kung ano 'yung nagbibigay sa atin ng enerhiya? Pinapakita niyo, pagod at puso pero ano 'yung nagbibigay sa atin ng enerhiya para kahit mainit, tumatiyaga tayo? Pagmamahal sa ating bayan.

Alam po natin na 'yung eleksyon na ito, napakahalaga. Napakahalaga dahil hindi lang po ito contest ng mga kandidato pero 'yung eleksyon na ito, ang atin pong dedesisyunan, ano 'yung magiging pamahalaan natin sa susunod na anim na taon. Marami po 'yung makikiusap sa inyong mga kandidatong national, hihingiin ang inyong tulong. Pero 'yung akin lang pong pakiusap, pag pumunta po sila dito sa inyo, hingiin ang inyong tulong, sasabihin nila mahal namin ang Cebu, dapat 'yung tanong natin sa kanila: papaano niyo pinakita 'yung pagmamahal niyo sa amin? Sa mga mahihirap na pinagdadaanan ba namin, nandiyaan ba kayo para damayan kami?

Alam niyo po 'yung iba, magagaling lang kasi humingi ng tulong pag eleksyon pero pag hindi pa sila kandidato, hindi naman nila tayo naiisip. Ako po, noong umupo ako bilang vice president, napakaraming mga Abgat Buhay projects ang binaba po namin dito sa Cebu. Marami po tayong mga tulong – ang haba nga ng listahan, hindi ko na babasahin – pero ang mga tulong po natin pag dating sa kalusugan, halimbawa po sa San Remigio, naglagay po tayo ng mental health facility para tulungan ang San Remigio.

Dito po sa Tuburan naglagay po tayo ng irrigation para sa coffee farmers. Sa Tabuela, nagbigay po tayo ng ambulansya. Sa Carcar nagcontructr po tayo ng isang bagsakan center. Halimbawa, sa Naga Cebu ay naglagay po tayo ng Livelihood Center. Sa Dalahete meron din tayong mental health program. Sa Daanbantayan marami po tayong mga sustainable livelihood and training programs. May mga ospital po dito sa Cebu na nilalagyan natin ng pondo para 'yung mga walang pambayad sa ospital, chinacharge sa pondo namin sa Office of the Vice President.

Noong nagkaroon po ng pandemiya, meron kaming permanenteng team dito po sa Cebu para tulungan 'yung ating mga frontliners. Naglagay po tayo ng mga ruta ng mga shuttle buses, naglagay po tayo ng mga dormitories para sa ating mga frontliners na pwede nilang matirahan na libre. Naglagay po tayo ng shuttle service mula po sa Olanggo Island hanggang sa Mactan.

Marami po tayong mga relief operations tuwing may bagyong nangyayari. In fact pagkatapos po ng Typhoon Odette– dalawang araw pagkatapos ng Typhoon Odette nandito po ako sa Cebu City para simulan 'yung relief operations. Tuwing may sunog nandito kami, tuwing may bagyo nandito kami, pag pandemic nandito kami.

Bakit po namin 'yun kinukwento sa inyo ngayon? Dahil 'yun po 'yung dapat asahan natin sa public servants. Hindi po 'yung nakikita lang natin pag eleksyon. Dapat may eleksyon o wala basta kailangan kami, nandiyan kami. Kaya po kami, uulitin ko lang, talagang sumadya kami dito kahit malayo para po iparamdam sa inyo na kahit malayo kayo hindi namin kayo papabayaan. 'Yung amin pong pangakong "Gobyernong Tapat" mahaba po 'yung aming resibo. Si Senator Kiko po matagal nang lingkod bayan pero ni isang beses hindi nadawit 'yung pangalan niya sa kahit anong anomalya.

Kami po sa Office of the Vice President, sunod-sunod na taon kami po 'yung nakakakuha ng pinakamataas na COA audit rating, pagpapakita na malinis 'yung mga proseso namin, 'yung pondo ng taong bayan pinapangalagaan namin. 'Yan po 'yung dahilan kung bakit nakakatulong kami sa saan mang sulok ng ating bayan.

Kapag nangako po 'yung politiko na "Angat Buhay Para sa Lahat" sasabihin ko po sa inyo kung hindi matapat 'yung pamahalaan, hindi po aangat 'yung buhay ng lahat. Dahil imbis na pantulong na lang, napupunta pa sa korapsyon.

Pero, ako lang po, napakahalaga ng mga volunteers, dahil pagkatapos po ng eleksyon, kapag nanalo na tayo, mas malaki po 'yung trabaho natin. Ang trabaho natin iparamdam sa bawat Pilipino na aasikasuhin sila. Iparamdam sa lahat ng nakakaginhawa na tumulong sa mga nahihirapan. 'Yun naman 'yung bayanihan di ba?

Nandito po tayo ngayon maraming nagbabayanihan nagbibigay ng pagkain, nagbibigay ng sasakyan, lahat tulong-tulong 'yung taumbayan dahil may tiwala sila sa mga namumuno sa kanila.

Kaya nagpapasalamat po tayo sa lahat na volunteer groups. Nagpapasalamat po tayo sa LGU Bantayan, nagpapasalamat po tayo sa simabahan sa suportang ibinigay dahil kung wala po 'yung kanilang suporta hindi din po natin ito magagawa.

Hindi na po kami magtatagal dahil napakahaba pa po ng araw natin. Pero maraming maraming salamat po sa inyong lahat. Ang sabi po dito "Climate change must be embedded in government plan," tama yan. Dapat hindi na iisipan 'yung climate change kapag bumabagyo lang. "Goodland for Leni-Kiko," 'yung ating mga mangingisda maraming salamat sa inyo. "Leni is the one," "Ang leftover campaign fund ang dapat i-withdraw hindi ang aming kandidato."

“Ang la–” ay naku, hindi ko yan babasahin kasi magkakaproblema ako, pasensya na. "Ha? Anong camp sawi? Camp Leni ang magwawagi." "VP Leni, buti Dora the Explorer ang pinanuod at hindi Antman, tuloy nahanap mo ang Bantayan Island sa mapa." "Sakripisyo para sumulong at hindi solusyon ang pag-urong. Si Leni ang pag-asa ng Pilipinas."

"Feeling bright sa Sta. Fe for Leni." "Mga only child for Leni." "Lugaw pagkaon namong mga pobre,, VP Leni, ikaw ang among paglaum," maraming salamat. "Welcome to Bantayan, VP Leni, and advance happy birthday," maraming salamat po, sa Sabado pa po ang birthday ko.

"Mag-aabugado dahil kay Leni Robredo," maraming salamat. [Crowd singing happy birthday] Ngayon na kinakantahan niyo ako binigyan ako nung mga mangingisda ng cake, nasaan na 'yung cake natin na napakaganda? Paakyat natin 'yung cake. Maraming salamat sa inyo, maraming salamat. Maraming salamat, salamat po. Maraming salamat. Wow! Maraming salamat po, kahit sa Sabado pa 'yung birthday ko, parang pakiramdam ko birthday ko na din ngayong araw. Maraming salamat. Maraming salamat po.

Ayan ano ito? "Sa gobyernong tapat babantayan ang corrupt." "Hirap sa Taxation pero hindi boboto ng tax evader." "The future is looking good." "May mga attitude for Leni-Kiko pero pwede pa picture salamat po," 'yung mga magpapa-picture lumapit na lang. "Laging alerto bantayan ang boto natin laban Leni-Kiko," ayun. “VP Leni may exams pa po kami–” hindi ko pa nababasa 'yung baba, “–maraming salamat madame.” "May malapit pong ATM dito baka gusto niyo pong magwithdraw," ang problema may mawi-withdraw pa ba? Maraming gastos ngayon.

Ayan “Good–” ay nabasa ko na ito. "God is a woman, so is my President." "Gobyernong Tapat para sa mga hindi naging sapat." "Tinawid ko ang dagat para sa Gobyernong Tapat." "Preggy for Leni para may future si baby," uy, mag-iingat kayo. "Leni anong meron ka bakit hindi kita kayang ipagpalit sa iba?" napaka-sweet mo naman kuya.

"Mga hindi pa tapos sa research for Leni," trabaho na pagkatapos nito ah, "I’m craving for six years of good governance."Bantay–” "Bantayonon Normalites for Leni." "Penpen de sarapen presidente ko number 10." "A revolutionary woman can’t have no reactionary man, abante babae." "VP Leni iboboto ka ng mama namin para sa aming magandang kinabukasan," pasabi po maraming salamat.

“Ikakagalit ba ng Nescafe kung para kay Leni ako bumabangon." "Si VP Leni ang dahilan kung bakit financially independent na ang mga be informed." "VP Leni ipaubaya mo na sa akin si Jungkook dahil ipapaubaya ko na sa iyo ang Piliinas," pag-iisipan ko muna. "Usasi–” “Usa sa Leni bo, kabantayan– banatay– Bantayanon nga ni Kiko opera para kaayohan sa Pilipinas.” "Sa Gobyernong Tapat threatened ang mga corrupt."

Ano ito, “Bansayanon for Leni,” "Respect my onion because why not." Ayan hindi na po kami magtatagal, maraming maraming salamat mabuhay po kayong lahat!

[END]