< Back to Transcripts

Message of Vice President Leni Robredo at GUINALINGAN: Guinayangan People’s Rally, Brgy. Calimpak, Guinayangan, Quezon

April 28, 2022
Guinayangan, Quezon
No items found.

VP LENI: Magandang hapon Guinayangan! Kumusta po kayo? Alam niyo ginulat niyo ako, alam kong maliit lang naman Guinayangan, bakit ang dami niyo ngayong hapon? Maraming salamat. Bago po ako magpatuloy, ang akin pong pagbigay galang sa atin pong minamahal na mayor, Mayor Boyboy maraming salamat po. Kay Vice Mayor Norman, maraming salamat. Sa atin pong mga councilors, nandito din po ang ating former Congressman Erin Tañada. Sa inyo pong lahat, magandang magandang hapon.

Alam niyo po, parang hindi kayo iniinitan ano? Parang hindi mainit.

[crowd cheers]

Maraming salamat po. Alam niyo po, ewan ko lang kung alam niyo, na noong tumakbo po ako noong 2016 bilang vice president, ang Guinayangan po ang nagbigay sa akin ng pinakamalaking percentage of votes.

[crowd cheers]

Maraming salamat. Ayan, maraming salamat. Ito, kasama ito, ayan. Maraming salamat po, papahawakan ko muna. Ito pa, maraming salamat. Maraming salamat.

Ayan. Hindi pa ako nakakapag-simula, may kumukuha na sa aking ninang sa kasal. Asan 'yung groom mo? Asan 'yung groom? Nandiyan? Ayun, mga "Kabataan ni San Luis for Leni-Kiko," maraming salamat. "Graduating students for Leni," maraming salamat. "Sa gobyernong tapat, sahod ng guro itataas."

[crowd chants]

Ito, ano ito? "Sa gobyernong tapat, [Young-E marry 3:12] me." "May mga hang over for Leni." "Sa gobyernong tapat–" ito may hugot ito, "–bakit di ako sapat?" Ayan, "VP Leni pumunta na tayo sa exciting part." "President of the Philippines." Oh, ito meron 'tong assignment, "Anak ng BBM supporter for Leni." Ano ito? "Sabongeras–sabongeras sabongeros for Leni."

“Meron o wala–”

[crowd replies]

"–Sa'yo pa rin tataya." "VP Leni, pahingi naman ng liwanag, dito kasi laging brownout." "Mga anak ng mangingisda for Leni." 'Yan, "Papunta pa lang tayo sa exciting part." "Your future engineer is voting for Leni." "Single ako, puwede niyong jowain." Ano ka, nag-aapply?

"Leni-Kiko, pa-experience naman ng six years na walang trust issues." "Mainitin ang ulo for Leni-Kiko." Chill lang lagi, chill lang, mag mana ka sa akin. "My–" Ano ba ito? "My rainbow heart is for Leni." "Sayangin mo na ako, wag lang si Chel Diokno." "VP Leni and Sen Kiko ay member ng SVT, Serbisyong Very Tapat. #Caras for Leni-Kiko." "Ang L sa [XOLs 5:19] ay Let Leni Lead." "[Carat 5:25] for 17th president of the Philippines." "Mga delikado sa second sem for Leni." "Future Med Techs for Leni."

"Pag si Leni naging presidente–" o, promise mo 'yan ha, "–hindi na kami mag-iinom." Ay nako, binawi naman kaagad. Binawi, mag-iinom pa rin. Ano 'yun? Sino dito ang mga tumakas? Wag tatakas, wag tatakas kasi hindi na sa akin boboto 'yung mga magulang niyo. "Kung ngayon nasa Quezon ka, sana pagkatapos ng eleksyon nasa Malacañang na."

"Mga naubusan ng pink na damit for Leni." Ito ha, kahit anong kulay welcome sa atin. Kahit 'yung hindi pa natin supporter, welcome din, mamahalin pa din natin. Ano ito? "Ma'am VP Leni Robredo, dati iboboto kita–" alam niyo mauubusan kayo ng boses, sandali lang, sandali lang. "Ma'am VP Leni Robredo, dati iboboto kita dahil kapitbahay ka namin, now dahil makabayan at maka-Diyos ka bilang isang leader." Ano ito, “UP Pilipinas at Guinayangan.”

Oh, "Edmonton for Leni," galing po kayong Canada? May kapatid ako doon. Opo, mamaya. "Teachers for Leni-Kiko." "PHILRECA–PHILRECA number 64 sa ballot, Guinyangan chapter." "Support Leni Robredo." "Guinayangan Leni." "Tubig para sa tumindig." "Leni is my Ms. Right. If you lose her, it's a miss, right?" May nakita ako doon, "Teachers for Leni-Kiko." "Anak ng guro for Leni-Kiko." "Mga sakristan for Leni," nagpaalam ba kayo kay Father?

"Sa gobyernong tapat, it's the love shot." Ayan, "Mga amoy araw for Leni-Kiko," kasali ako diyan. "Heart stopper for Leni-Kiko." Ayan, "Ikakagalit ba ng Nescafe kung para kay mama Leni ako bumabangon?" "Ang kinabukasan–ang kinabukasan ng May 10–ay May 9 ay 10." Okay 'yan eh. "Guinyangan–" ano 'yan? "Guinyangan private group." "Sa gobyernong tapat, takot ang mga korap." Ah ano ito? "RPC Buenavista Leni-Kiko volunteers," ayun. "Seven plus three plus ten." "Mga sanay sa brownout for Leni." "Not yet voters, but still your supporter." Ayan.

Ay meron pa, "Papunta pa lang tayo sa exciting part, magiging kulay rosas ang bukas,” “Sa kulay na kalimbahin, hindi tayo bibiguin," ayun. Ah ito pala "7 + 3 + 10. Ang 7, Governor Dra. Helen Tan. Ang 3, Mayor Maiden Isaac. Ang 10 ay President Leni Robredo." Maraming salamat po. Puwede bang ilagay niyo 'yung pangalan saka telephone number para makapag pasalamat kami?

[crowd cheering: Leni]

Teka muna. May hinahanap pa akong groom. Nasaan 'yung groom? Kinukuha akong ninang sa kasal pero hindi ko nakikita 'yung mapapangasawa mo. Asan? Asan? Sino? Ha? Sino? Tawagin mo 'yung groom. Tawagin 'yung groom. Pag nandito 'yung groom, ang sagot yes.

Ayan, "Above all elegant sa tapat na governance." Ayan puwede ba mag mensahe muna ako? Mamaya na muna tayo mag sisigaw ha? Ayan. Sasabihin ko kung puwede ng sumigaw. Magpi-picture tayo mamaya.

Alam niyo, gaya ng sabi ko, matagal ko ng gustong dumaan dito sa inyo dahil napakataas na boto 'yung ibinigay niyo sa akin noong 2016, at hindi pa ako sa inyo nakakapag pasalamat. Kaya maraming maraming salamat sa inyo.

Pangalawa, lagi akong dumadaan dito sa Quezon dahil umuuwi ako ng Bicol. Pero hindi ko nadadaanan 'yung Guinayangan. Pag pasok ko ng Quezon, Candelaria muna, Sariaya, Lucena, Pagbilao, Atimonan, Gumaca tapos Lopez na. Di ba Lopez tapos Calauag tapos Tagkawayan. Pagkatapos ng Tagkawayan, Bicol na. Kaya kahit gustong gusto kong dumaan dito sa Guinayangan, hindi nagkakaroon ng pagkakataon hanggang ngayong araw.

Pero nagkasama kami ni Mayor noong huli kong bisita dito sa Quezon. Sabi ni Mayor, Ma'am lahat na pumupunta ng Guinayangan nananalo. Tama 'yun Mayor? Tama 'yun? Meron na ba ditong ibang pumunta? Sana wala na ano?

Pero alam niyo, ito 'yung isang napansin ko sa kampanya, pag maliliit na lugar hindi na halos pinupuntahan ng mga kandidato. At lagi kaming sinasabihan, huwag mo na 'yang puntahan kasi kaunti lang naman 'yung botante diyan. Na tingin ko, ito 'yung mali di ba? Dahil– sabi ko mamaya na tayo sisigaw. Mamaya na. Sasabihin ko kung puwede na.

Mali 'yun kasi pag ako naging pangulo, dapat walang maliit, walang malayo. Lahat na mga lugar na nangangailangan ng tulong galing sa gobyerno, kailangan pinupuntahan di ba?

Kaya po ngayon, 'yung mga ikot namin– pangalawang punta ko na ito dito sa Quezon. 'Yung una kong punta, pumunta kami ng Sariaya, pumunta kami ng Pagbilao, pumunta kami ng Lopez, pumunta kami ng Mulanay, pumunta ng Lucena.

Ngayon na pagbalik namin, ang pupuntahan namin, 'yung mga hindi namin pinuntahan dati. Kaya kaninang maaga nandoon ako sa Catanauan. Pagkatapos ng Catanauan, punta ako ng Gumaca, ngayon nandito na ako sa inyo sa Guinayangan.

Mamaya, kung meron pang sisipagin, sama kayo sa amin sa Lucena. Ang grand rally natin– Kadilakad na lang daw, Kadilakad lang. Hindi, pero alam niyo, papunta pa lang kami dito sa Guinayangan galing sa Gumaca, ang dami na sa amin nagpapadala ng mga litrato, napakarami ng tao doon sa venue. Kaya kung kaya niyong pumunta, punta tayo kasi masaya.

Pero sinadya ko pa din kayo dahil alam ko marami 'yung hindi makakapunta dahil malayo 'yung lugar ninyo. Ano 'yun? Mag-uusap kami ni Mayor. Mag-uusap kami ni Mayor. Pero bawal 'yung hindi nagpaalam sa magulang ha? Bawal 'yung mga takas. Kasi di ba dapat mabuting halimbawa tayo. Di ba?

Oh ito po, ito 'yung aking mensahe dahil hindi ako laging nakakapunta dito. Mula noong ako naging Vice President, ni-launch po namin– mamaya na tayo sisigaw. Ni-launch po namin 'yung Angat Buhay Program. Ano ba 'yung Angat Buhay Program? Programa ito para sa mga mahihirap na mga lugar. Kaya po naghanap kami ng mga communities na ia-adopt, naglagay tayo ng mga projects doon at 'yun 'yung ginawa namin sa anim na taon na Vice President kami.

'Yung mga nilagyan natin mas malalayo, mas mahihirap, mas mga maliliit na mga lugar, pinupuntahan namin. Ano 'yun? Ah medic. Medic daw, medic. Bigyan niyo ng tubig. Meron kayong tubig? Meron kayong tubig?

May medic tayo pero pa-pass po sa kanila ‘yung tubig. Papasa na lang 'yung tubig. Ayun siguro magpasa tayo ng tubig. 'Yung mga uhaw na, uminom. Share share na lang ha? Share share. Ano po? Ano si Doc Tricia? Ayan. Papasa po ng mga tubig, mag share tayo para walang mahimatay. Maraming salamat. Oh grabe mga artista natin 'yung namimigay ng tubig.

Oh 'yung magkakasama share na lang muna ha? Para magkasya sa lahat. Okay na? Ah siya? Kailan ang kasal? Ha? June 8? Yes! Sige. Teka bigay niyo sa akin 'yung ano niyo. Saan ang kasal niyo? Dito sa Guinayangan? Mayor babalik pala ako dito may– bigay niyo sa akin contact number niyo. Ayan. Babalik pala kaagad ako Mayor. Dahil may ikakasal tayo.

Ano ‘yun? Mangyayari ‘yun kapag tinulungan niyo ako. “Buong pamilya Barzaga for Leni,” maraming salamat, pamilya Barzaga. ‘Yung sinasabi– teka muna, ‘yung sinasabi ko sa inyo, ‘yung aming programa para sa mga mahihirap, Angat Buhay, ‘yung pinakauna po naming partner community dito, Mulanay. Kaya po pabalik-balik kami sa Mulanay.

Pero pagkatapos po noon, maraming mga bayan sa Quezon, meron na din tayong mga programa. Kapag may sakuna, noong pandemic, nandito po tayo. Kapag meron pong bagyo, nagre-relief operations tayo. Noong pandemic, nagpapadala po tayo ng mga PPE sets, mga medical supplies. Nagkakaroon po tayo ng bakunahan, nagkakaroon tayo ng swabbing.

Hindi lang po 'yun, 'yung nagsara 'yung mga paaralan, naglagay po tayo ng mga Community Learning Hubs. Ilan ba 'yung Community Learning Hubs natin sa Quezon? Siyam. Meron tayong siyam na Community Learning Hub. Pinaka-malapit yata dito sa General Luna. Di ba? Sa General Luna ‘yung pinaka-malapit. Naglagay po tayo ng mga computers, nag-train tayo ng mga tutors para ‘yung mga bata na kailangan ng tulong, may napupuntahan sila habang sarado ‘yung mga paaralan.

Ano po ‘yung programa natin sa mga seniors? Nakita ko marami tayong seniors. Ang programa po natin sa seniors, walang pipiliin, lahat may pensyon. At ‘yung pensyon, dodoblehin natin, dahil ‘yung pensyon ngayon ng seniors, kulang pang pambili ng gamot.

Sa mga barangay officials, kung meron pong barangay officials dito. 100 percent support po tayo sa extension ng terms saka suspension ng inyong eleksyon. Dahil noong nasa kongreso pa po ako, author ako ng panukalang batas na dapat ‘yung term of office ng barangay, hindi lang tatlong taon, kundi limang taon.

Sa mga magsasaka na hirap na hirap ngayon, dahil ang baba ng presyo ng produkto pero napaka-mahal ng abono, napaka-mahal ng gasolina:tutukan po natin ‘yung tulong sa mga magsasaka saka mangingisda.

Sa mga estudyante, sisiguraduhin po natin, hindi magiging hadlang ang kahirapan para makapag-aral kayo.

Para po sa lahat, sisiguraduhin po natin na kahit wala tayong pambayad, kung kinakailangan natin ng gamot, ng libreng doktor, ng serbisyo sa hospital, ng operasyon, magagawa natin ‘yun para sa inyo.

Sa mga teachers, nakita ko po maraming teachers. Agree po ako sa inyo, kapag kinumpara natin ‘yung sweldo ng mga teachers natin dito sa Pilipinas kumpara sa mga karatig nating bayan – bansa, napaka-layo. Kaya po ang ibang teachers, napipilitan pumunta sa ibang bansa, dahil napaka-baba ng sweldo natin.

Pero hindi lang po ‘yun. Marami po tayong problema sa quality ng education ngayon. At ang isa sa dahilan, ang trabahong binibigay natin sa teachers natin, grabe. Dapat sana, ang teachers natin, nakakapag-consentrate sa instruction. Hindi na binibigyan ng napakaraming admin work saka napakaraming papeles na kailangang i-accomplish.

Kaya po, ang gusto po natin quality ‘yung ating teachers kaya dapat alagaan natin sila. Kapag sinabi nating alagaan, pati po ‘yung further studies ninyo, pag-aaral, dapat suportado ng gobyerno. Kasi kapag nakakatutok ‘yung mahuhusay na teachers sa estudyante, ang resulta nito mahuhusay na estudyante.

Napakarami po natin, napakarami po nating mga plano. Pero magagawa lamang natin ang ating mga plano pag ang gobyerno tapat. Dahil po kahit anong plano, kung hindi naman matapat ang gobyerno, hindi natin ‘yun magagawa. Kapag sinabi po nating gobyernong tapat, anong gustong sabihin?

CROWD: Angat buhay lahat!

VP LENI: Aangat ang buhay ng lahat kung ang mga lingkod bayan natin matitino at mahuhusay. Kahit ano po ‘yung pangako natin, kung kurakot naman ‘yung ating pipiliin, wala ding pagbabagong maasahan.

Di ba po? Ang aking pong pangako sa inyo, hindi natin papabayaan ang lalawigan ng Quezon. Alam po ito ni Mayor. Alam po ito ni Congressman Erin. Malapit po kami ni Dra. Helen Tan. Magka-batch po kami, magka-klase po kami sa 16th Congress at magka-barkada kami. Alam ko po kung gaano kasipag, at alam ko kung gaano niya kamaha ang Quezon. Kaya kapag pareho po kaming pinalad, madaling makahingi ng tulong sa amin dahil magkakasama kami pati po sila Mayor Boyboy, ayun.

Kaya po ako, humihingi po ulit ako ng tulong. Noong 2016 pong pumunta ako sa Quezon, humingi ako ng tulong. Kahit hindi niyo pa akong gaanong kilala, tumiwala po kayo sa akin, nanalo po ako ng napakalaki sa Quezon.

Ngayon po, bumabalik ako. Bumabalik ako, humihingi ulit ng tulong. Pero kapag hingi ko po ng tulong hindi na ito gaya noong 2016 na wala pa ako sa inyong maipakita. Ngayong pong 2022, malakas na ‘yung loob kong humingi ng tulong dahil marami na po akong resibo ng aking mga nagawa. Kaya po matitignan ko kayo, mata sa mata, kaya kong sabihin sa inyo na hindi ko sinayang ‘yung tiwala na binigay ninyo sa akin.

Humihingi po ako ng tulong hindi lang para botohan po tayo. Padamay na rin po ng aming team, Vice President Kiko Pangilinan. Ang ating pong mga senador, Attorney Chel Diokno, Congressman Teddy Baguilat, Attorney Alex Lacson, Attorney Sonny Matula, Senator Sonny Trillanes, Senator Dick Gordon, Senator Leila de Lima, saka Senator Risa Hontiveros.

Nagpapa-salamat po ako kay Mayor Boyboy, kay Vice Mayor Norman. Sa lahat pong mga local officials ng Guinayangan, sa napaka-init na pagtanggap sa akin ngayong hapon. Sa atin pong mga barangay officials na kasama po natin. Ang ating pong mga volunteer groups, RPC Guinayangan, RPC Quezon, iba’t ibang pong mga volunteer groups na talagang nagpapagod para tulungan po tayo sa pag-ikot dito sa Quezon, maraming maraming salamat.

Sana po pagbalik ko, sa kasal nila, nasaan na ‘yung ikakasal? Sana pagbalik ko sa kasal nila, pangulo na ako. At magiipon ulit tayo para mag-victory celebration na tayo. Maraming maraming salamat po. Mabuhay po kayong lahat.  

[END]